Кеше Астанада Qaztrade және Таиландтың сауда Кеңесі Қазақстан мен Таиланд Корольдігі Сыртқы істер министрлерінің орынбасарлары Назира Нұрбаева мен Джаккапонг Сангманидің қатысуымен ынтымақтастық туралы Меморандумға қол қойды.
Кездесуде тараптар түрлі бағыттар бойынша өзара тиімді ынтымақтастықты кеңейту жолдарын талқылады. Таиланд Қазақстан үшін Оңтүстік-Шығыс Азиядағы маңызды сауда серіктесі болып табылады. Соңғы жылдары біздің елдеріміздің сауда-экономикалық көрсеткіштері сенімді өсуді көрсетіп отыр. 2023 жылдың қорытындысы бойынша өзара тауар айналымы 36% – ға артып, 367,6 млн долларды құрады. Бұл ретте, Таиландқа қазақстандық экспорт көлемі 17,9 есеге өсіп, 55,3 млн долларды құрады.
Меморандумға қол қоюшылардың пікірінше, өзара уағдаластықтарды бекіту екі мемлекет арасындағы іскерлік байланыстарды одан әрі дамытуға және тәжірибе алмасуға серпін береді.
Қазақстан тарапынан ынтымақтастық туралы Меморандумға «QazTrade» АҚ Бас директорының орынбасары Әсел Егембердиева қол қойды, Таиландтың сауда Кеңесі төрағасының орынбасары, балық индустриясы қауымдастығының және Таиландтың мал азығы сауда қауымдастығының президенті Чанинтр Чалисарапонг қол қойды.
«Біз Таиландқа 900 млн доллардан астам сомаға 130 тауар позициясы бойынша экспортты ұлғайтуда үлкен әлеуетті көріп отырмыз. Бұл металлургия, химия және мұнай – химия, ауыл шаруашылығы (бидай, тыңайтқыштар және мал азығы), минералдық ресурстар және басқа да салалардың тауарлары», – деп атап өтті Әсел Егембердиева.
Ынтымақтастықтың тағы бір бағыты Қазақстан аумағында экспортқа бағдарланған бірлескен өндірістерді іске асыру болуы мүмкін.
Қорытындысында QazTrade өкілі Таиландтан келген бизнес-делегация өкілдеріне қазақстандық тауарларды жаңа нарықтарға жылжыту және бизнес мүдделерін қорғау жөніндегі компанияның қызметі туралы айтып берді. Экспорттық акселерация бағдарламасы, кәсіпорындарды электрондық сауда алаңдарына шығару, сондай-ақ сауда миссияларын өткізу және әлемнің әртүрлі елдеріндегі көрмелерге қатысу сияқты қолдау құралдары шетелдік әріптестермен сауданы дамытуға ықпал етеді.