Сауда және интеграция министрлігі мен QazTrade ұйымдастырған сауда-экономикалық миссия аясында Қазақстан Пәкістанға тұрақты экспорттық бағытты іске қосудың алғашқы қадамын жасауда.
Миссияның басты нәтижесі – Карачи қаласында Қазақстанның Сауда үйін ашу туралы шешім. Мұнда ең ірі логистикалық оператор TCS, Сауда-өнеркәсіп палаталарының федерациясы, сондай-ақ жетекші импорттаушылар мен сауда желілерінің кеңселері орналасқан. Карачи порттары – Karachi Port және Port Qasim жүк өңдеудің жоғары жылдамдығын және тұрақты экспорттық тізбектерді қамтамасыз етеді.
Исламабад B2G форматында (мемлекет–бизнес) жұмыс істеу үшін пайдаланылатын болады, ал негізгі хаб дәл Карачи қаласында ашылады. Сауда үйін қалыптастыру 2026 жылдың басында басталады.
Миссия логистиканы жеңілдетуге және рәсімдерді жеделдетуге бағытталған бірқатар меморандумдарды да бекітті. Пәкістан тарапынан TCS, FPCCI және TDAP жүктерді сүйемелдейтін, порттық рәсімдерді жеделдететін және азық-түлік өнімдерінің сертификаттауына көмектесетін жұмыс тобын құрады.
«Қол қойылған құжаттар бізге ресми келісімдерден бөлек, жеткізілімдерді жеделдететін нақты құрал береді. Пәкістан Қазақстанға экспорттық келісімшарттарды тіркеуде басымдық беріп, сауда желілеріне және дистрибьюторларға шығуда қолдау көрсетеді. Яғни, логистика міндетті түрде арзандай қоймауы мүмкін, бірақ ол сөзсіз жылдамырақ әрі болжамды болады. Бюрократия азайған сайын, сату мүмкіндігі артады – біз келіссөздерде дәл осы нәтижеге қол жеткіздік», – деді QazTrade басқарушы директоры Берік Ахметов.
2025 жылғы қаңтар–қыркүйек аралығында тауар айналымы 95,8 млн долларды құрап, өткен жылмен салыстырғанда 2,3 есе өсті (42,3 млн доллар). Қазақстан экспорты 6,1 есе өсіп, 56 млн долларға жетті. Сауда балансы алғаш рет оң көрсеткішке шығып, –24 млн доллардан +16,3 млн долларға дейін жақсарды.
Миссияның маңызды нәтижелерінің бірі – Қазақстанның Астық өңдеушілер одағы мен M.A. International компаниясы арасындағы келісімге қол қою. Құжат бидай ұны мен қайта өңделген өнімдерді экспорттау бойынша ұзақ мерзімді серіктестікті бекітеді. Бұл санатқа Пәкістанда сұраныс өте жоғары. Келісім 2026 жылдан бастап жеткізілімдерді ұлғайтуға негіз қалайды және Қазақстанның астық өңдеу секторын Оңтүстік Азия нарығында нығайтады.
Экспортты бастауға арналған алғашқы тауар пулі де анықталды. Оған мыналар кіреді:
– ұн,
– сүт өнімдері (құрғақ сүт, сыр, қоюлатылған сүт),
– өсімдік майлары,
– жармалар мен бұршақ дақылдары,
– алкогольсіз сусындар мен шырындар.
Бұл тауарларға Пәкістан тұрақты әрі ірі көлемде сұраныс танытады.