Соңғы жыл ішінде Қазақстан мен Пәкістан арасындағы сауда көлемі екі еседен астам өсті, енді бұл нәтижені іс жүзінде бекіту уақыты келді. Алдағы уақытта қазақстандық кәсіпкерлер Карачи қаласына сауда-экономикалық миссиямен барады. Қатысуға қызығушылық танытқан компаниялардың қатарында алкогольсіз сусындар, лак-бояу өнімдері және энергетикалық жабдық өндірушілері бар.
«Біздің кәсіпорындар Пәкістанды азық-түлік, ауыл шаруашылығы және өнеркәсіп тауарларын жеткізуге әлеуеті жоғары нарық ретінде қарастырады», – деп атап өтті QazTrade өкілдері.
Миссия қарсаңында пәкістандық нарықта жұмыс істеудің ерекшеліктеріне арналған онлайн-семинар өтті. Ынтымақтастық әлеуетін талқылау алаңы болған «Пәкістанның іскерлік мүмкіндіктері» семинары QazTrade пен Қазақстан Республикасының Пәкістандағы Елшілігі бірлесіп ұйымдастырды.
Елші Ержан Кистафин екі ел арасындағы ынтымақтастық әлеуеті жоғары деңгейде екенін атап өтті. Оның айтуынша, қазақстандық компаниялар пәкістандық нарықта азық-түлік саласында ғана емес, сонымен қатар білім беру және көлік-логистика қызметтері сияқты бағыттарда да табысты бәсекеге түсе алады.
Онлайн-кездесу барысында қатысушылар логистиканы және виза рәсімдерін жеңілдету, сондай-ақ бірлескен кәсіпорындарды дамыту сияқты практикалық мәселелерді талқылады. Бұл тақырыптар қазақстандық өндірушілер арасында ең өзекті бағыттардың бірі болды.
QazTrade деректеріне сәйкес, 2025 жылдың қаңтар–қыркүйек айларында Қазақстан мен Пәкістан арасындағы тауар айналымы $95,8 млн құрады, бұл өткен жылмен салыстырғанда 2,3 есе көп. Қазақстан экспорты 6,1 есеге өсіп, $56 млн жетті, негізінен мұнай, бұршақ және зығыр тұқымдарын жеткізу есебінен. Пәкістаннан импорт шамамен 20%-ға өсіп, $39,8 млн құрады, негізінен картоп, тоқыма және цитрус өнімдері жеткізілімдерінің артуына байланысты.