Экспортты ілгерілету жөніндегі жедел штаб
Қазақстандық экспорттаушылардың алдында тұрған сын-қатерлерге жедел әрекет ету мақсатында QazTrade экспортты ілгерілету жөніндегі жедел штабты жинады.
Іс-шараға бизнес өкілдері, Сауда және интеграция министрлігі, Ауыл шаруашылығы министрлігі және ұлттық теміржол операторы — «ҚТЖ» ҰК» АҚ өкілдері қатысты.
Ара балын БАӘ-ге экспорттау
Айтмұхамед Алдажаров қазақстандық ара шаруашылығы өнімін Біріккен Араб Әмірліктеріне (БАӘ) экспорттауды белсендірек дамытуға шақырды:
«Қазір біз БАӘ-де белсенді жұмыс жүргізіп жатырмыз. Жақында Парсы шығанағындағы ең ірі сауда желілерінің бірі — LULU Group компаниясымен байланыс орнаттық. Бұл компания әлем бойынша 280-нен астам гипермаркет желісін басқарады. Олар балды ірі көлемде сатып алуға дайын. Кездесу барысында логистика және сертификаттау мәселелерін талқыладық».
Оның айтуынша, тараптар келісімшартқа қол қоюға жақын. Осыған байланысты QazTrade бас директоры отандық бал өндірушілерді белсенді қатысуға шақырды:
«Бізге нақты нәтижелер қажет — сіздің келісімшартыңыз, нақты сатылымыңыз. Біз көмектесуге дайынбыз, бірақ сізден нақты ақпарат қажет: қанша көлемде, қандай мерзімде жеткізе аласыз және қандай құжаттарыңыз бар. Егер осындай мәліметтер болса, біз сізді ағымдағы келіссөздерге жедел түрде қоса аламыз».
Сала мәселелері мен мүмкіндіктері
Өндірушілер қазіргі жағдай туралы айтты. Олардың айтуынша, Қазақстан балының негізгі тұтынушыларының бірі — Өзбекстан, бірақ онда баға өте төмен (700–750 теңге/кг), бұл өзіндік құнды жаппайды. Сонымен қатар, контрабанда да нарықты бұрмалап, саланың дамуына кедергі келтіруде.
Еуропа нарығы да бар, бірақ ол жаңа бағыт. «Бал-Ара» Қазақстан ұлттық омарташылар одағының президенті Ғабит Нұрадил былай деді:
«Еуропа нарығы да бар, бірақ біз ол жақпен енді ғана жұмыс істей бастадық. Бұл нарыққа шығу үшін қатаң тексерулерден өту керек — бұл біз оған қаншалықты тез бейімделе алатынымызға байланысты».
Нәтижелер және келесі қадамдар
Сондай-ақ, отырыс барысында Экспорттық штабтың қолмен басқару режиміне көшкені жарияланды. Енді QazTrade алаңында талқыланатын шешілмеген мәселелер алдымен Сауда және интеграция министрлігіне, содан кейін Үкімет Аппаратына шығарылады.