Қазақстандық бизнес Пәкістанмен саудадағы басты кедергіні логистика деп атады
Бүгін Карачи қаласында екі елдің билік және бизнес өкілдері қатысқан қазақстан-пәкістан бизнес-форумы өтіп жатыр.
Форумда ұлттық сауда қолдау операторы «QazTrade» компаниясының басқарушы директоры Айнұр Әмірбекова қазақстандық экспорт мүмкіндіктерін және кәсіпкерлерге арналған қолдау құралдарын таныстырды.
«Қазақстан сыртқы сауданы белсенді дамытып, ұлттық бизнестің шетелдік нарықтарға шығуына жағдай жасауда. QazTrade экспорттаушыларды мүмкіндіктерді іздеуден бастап келісімшарттарға қол қоюға дейін барлық кезеңдерде сүйемелдейді. Біз акселерациялық бағдарламалар ұсынамыз, шығындардың бір бөлігін өтейміз, бизнес-миссиялар мен сауда-экономикалық миссиялар ұйымдастырамыз, компаниялардың халықаралық маркетплейстерге шығуына көмектесеміз және олардың мүдделерін ЕАЭО және ДСҰ аясында қорғаймыз».
Спикер экспорттық акселерация бағдарламасына ерекше назар аударды:
«Қазақстанда шағын және орта бизнеске сыртқы нарыққа шығу үшін барлық кезеңдерде сараптамалық қолдау көрсетілетін экспорттық акселерация бағдарламасы сәтті жүзеге асырылуда. Барлық қызметтер тегін көрсетіледі. Бағдарлама географиясы Орталық Азияны, Еуропаны, Таяу Шығысты, Қытайды, Ресейді, Әзербайжан мен Түркияны қамтиды. Біздің мақсатымыз – экспорт көлемін арттырумен қатар, өзара сенім мен ортақ мүдделерге негізделген ұзақ мерзімді серіктестік орнату», — деді Әмірбекова.
Форумға Қазақстанның ауыл шаруашылығы, логистика, азық-түлік өнеркәсібі, тоқыма индустриясы, қаржы және инвестициялық қызметтер, инжиниринг, энергетика, медициналық құрылғылар, туризм және экологиялық қызметтер сияқты негізгі экономикалық секторларының өкілдері қатысты.
Сауда айналымының өсуі және жаңа мүмкіндіктер
Екі ел арасындағы өсіп келе жатқан экономикалық байланыстар серіктестікті нығайтуға деген өзара қызығушылықты көрсетеді. Форумда Пәкістанмен қатынастарды дамытуға ерекше назар аударылды. 2023–2024 жылдары тауар айналымы 2,1%-ға өсіп, 53,6 миллион АҚШ долларына жетті.
QazTrade деректеріне сәйкес:
- Қазақстанның Пәкістанға экспорты 2,1 есе өсіп, 11,8 миллион АҚШ долларын құрады;
- Экспорттың негізгі бөлігін ауыл шаруашылығы өнімдері: пияз, сарымсақ, зығыр тұқымы, бұршақ дақылдары және металл құрылымдары құрайды;
- Пәкістаннан импорт көлемі 41,9 миллион АҚШ долларын құрады — негізгі өнімдер: цитрус жемістері, дәрілік заттар және тоқыма өнімдері.
Бұл көрсеткіштер өзара қызығушылықтың артып келе жатқанын және сауда қатынастарын одан әрі дамыту үшін үлкен әлеует бар екенін дәлелдейді.
Логистика — басты мәселе
Форум қатысушылары Пәкістанды қазақстандық өнімдер үшін перспективалы нарық ретінде атап өтті. Алайда, логистикалық шығындарды төмендету қажеттілігі де ерекше атап өтілді.
«Бүгінгі таңда Пәкістанмен жұмыс істеудегі негізгі кедергілердің бірі – логистика. Жеткізу құнының жоғарылығы қазақстандық жеткізушілерде белгілі бір алаңдаушылық туғызады. Ал сапалы өнім болған жағдайда сертификаттау мен кедендік рәсімдерден өту үлкен қиындық тудырмайды», — деді «QazTextileIndustry» жеңіл өнеркәсіп кәсіпорындарының Ұлттық қауымдастығының басқарма төрайымы Гүлмира Уахитова.
B2B-келіссөздер және алдағы жоспарлар
Форумға Қазақстаннан 60-тан астам компания, ал Пәкістаннан шамамен 200 компания қатысты. Іс-шара аясында тікелей іскерлік байланыстар орнатуға, экспорттық мүмкіндіктерді талқылауға және бірлескен жобаларды іске қосуға бағытталған белсенді B2B-келіссөздер өтті.
QazTrade Пәкістанмен ұзақ мерзімді серіктестікті дамытуға ерекше назар аударады, тек сауда көлемін арттырумен шектелмей, сондай-ақ бірлескен инфрақұрылымдық, өндірістік және логистикалық жобаларды іске асыру арқылы екі елдің экономикалық өркендеуіне ықпал етуді мақсат етеді.