QazTrade-тің әлеуметтік маңызы бар азық-түлік тауарларының бағаларын мониторингілеу саласындағы қызметі

«QazTrade» Сауда саясатын дамыту орталығы» АҚ Қазақстан Республикасында әлеуметтік маңызы бар азық-түлік тауарлары (ӘМАТ) бағаларын тұрақтандыру саласындағы мемлекеттік саясатты сараптамалық-талдамалық сүйемелдеуді жүзеге асырады.

Тұрақты негізде Қазақстан Республикасының барлық өңірлерінде әлеуметтік маңызы бар азық-түлік тауарларының бағаларына апта сайынғы мониторинг жүргізіледі. Мониторинг барысында ресми статистикалық деректер, сондай-ақ мемлекеттік органдардың, жергілікті атқарушы органдардың және ашық дереккөздердің ақпараттары пайдаланылады.

Мониторинг шеңберінде баға ахуалына кешенді талдау жүргізіледі, оның ішінде:

• өңірлер және жекелеген тауар позициялары бойынша бағалардың өзгеру динамикасын бағалау;
• бағалардың өсуіне немесе төмендеуіне әсер ететін факторларды анықтау;
• өндіріс, импорт, экспорт, маусымдылық, логистикалық және басқа да факторларды қоса алғанда, ішкі және сыртқы нарықтардағы жағдайды талдау;
• баға тұрақтылығы мен азық-түлік қауіпсіздігіне ықтимал тәуекелдерді бағалау.

Жүргізілген талдау нәтижелері бойынша QazTrade Қазақстан Республикасы Сауда және интеграция министрлігі үшін сараптамалық-талдамалық материалдар мен ұсыныстар әзірлейді. Олар негізсіз баға өсуінің алдын алуға және ішкі нарыққа теріс әсер ететін факторлардың ықпалын төмендетуге бағытталған.

Бағалық тәуекелдерді ерте кезеңде анықтауға, нарықтық конъюнктураның ықтимал өзгерістерін болжауға және әлеуметтік маңызы бар азық-түлік тауарларының бағасына ішкі және сыртқы факторлардың теріс әсерін нивелирлеу жөніндегі шараларды әзірлеуге ерекше көңіл бөлінеді.

Жүргізіліп жатқан талдамалық жұмыс бағаны тұрақтандыру саласында қабылданатын мемлекеттік шешімдердің тиімділігін арттыруға, баға белгілеу процестерінің ашықтығын қамтамасыз етуге және Қазақстан Республикасының азық-түлік қауіпсіздігін нығайтуға ықпал етеді.