QazTrade 200 компанияның қатысуымен B2B-сессия өткізді, олардың ішінде ирандық бизнестің 74 өкілі бар, олар қазақстандық компаниялармен сауда қатынастарын дамытуға мүдделі.
Бүгін Қазақстан-Иран бизнес-форумы аясында Қазақстан Республикасы мен Иран Ислам Республикасының іскер топтары өкілдерінің екіжақты кездесуі өтті. Іс-шараны Қазақстан Республикасы Сауда және интеграция министрлігі мен Иранның Қазақстандағы Елшілігінің қолдауымен экспортты дамыту жөніндегі бірыңғай оператор – QazTrade ұйымдастырды.
QazTrade компаниясының бас директоры Айтмұхаммед Алдажаров былай деді:
«Тегеранда Қазақстан Сауда үйінің ашылуы туралы келісімге қол қойылуы – бұл символдық қадам ғана емес, сонымен қатар қазақстандық өнімді иран нарығына шығаруға нақты мүмкіндік. Біз күн сайын экспортқа жұмыс істейтін тұрақты инфрақұрылым қалыптастырып жатырмыз. B2B-сессия форматы жоғары іскерлік белсенділікті көрсетті – бір күнде 250-ден астам келіссөз өткізілді. Иран Ауыл шаруашылығы министрінің қатысуы – ИИР-дің, әсіресе, агроөнеркәсіп өніміне деген стратегиялық қызығушылығының дәлелі».
QazTrade Иран ет өнеркәсібі қауымдастығына және Масуд Расулиге серіктестікті дамытуға қосқан үлесі үшін алғысын білдірді. Тараптар бірлескен ет өңдеу кәсіпорындарын іске қосу, логистиканы дамыту және институционалдық шараларды талқылады. Сонымен қатар Иранның TPO ұйымымен меморандумға қол қойылып, Тегеранда QazTrade-тің тұрақты өкілі жұмыс істеп жатыр.
«Бүгінгі сессия – бір реттік іс-шара емес, бұл жүйелі платформаның бір бөлігі. Бізді стратегиялық мақсатқа – өзара сауда айналымын $3 млрд-қа жеткізуге жақындатады деп сенемін», – деп қорытындылады Алдажаров.
Соңғы бір жыл ішінде Қазақстан Иранмен экономикалық байланысты нығайту үшін бірқатар белсенді қадамдар жасады. 2025 жылдың ақпанында Тегеранда Қазақстанның 14 өңірінен 50-ден астам экспорттаушының қатысуымен сауда-экономикалық миссия өтті. QazTrade деректері бойынша, 2025 жылғы қаңтар-сәуір айларында Қазақстан мен Иран арасындағы тауар айналымы $173,5 млн-ды құрап, өткен жылдың сәйкес кезеңімен салыстырғанда ($96,9 млн) 79,1%-ға артқан.