Қазақстанның Сиань қаласындағы сауда-экономикалық миссиясы: ынтымақтастықтың жаңа перспективалары
2025 жылғы 2–3 сәуір күндері Сиань қаласында (ҚХР, Шэньси провинциясы) Қазақстанның сауда-экономикалық миссиясы табысты өтті. Іс-шараны ұйымдастырушы – Қазақстан Республикасының Сауда және интеграция министрлігінің және Қазақстанның Сиань қаласындағы Бас консулдығының қолдауымен «QazTrade» сауда саясатын дамыту орталығы» АҚ болды.
Сауда миссиясы Қазақстан мен Шэньси провинциясы арасындағы екіжақты экономикалық байланысты нығайту жолындағы маңызды қадам болды. Шара қорытындысы бойынша жалпы сомасы 98 млн АҚШ долларына келісімдерге қол қойылды. Бұл келісімдер қазақстандық өнімдердің экспортын дамытуға және ұзақ мерзімді іскерлік байланыстар орнатуға қолайлы жағдай жасайды.
Сауда және интеграция министрлігі, Қазақстан Республикасының ҚХР-дағы Елшілігі және Қазақстанның Сиань қаласындағы Бас консулдығы халықаралық миссияны үйлестіру мен іскерлік кездесулерді ұйымдастыруда негізгі рөл атқарып, іс-шараны жоғары деңгейде өткізуді қамтамасыз етті.
Айрықша назар аударуға тұрарлығы – QazTrade миссиясының Бас консулдық аумағында алғаш рет жаңа форматта өткізілуі. Дипломатиялық өкілдіктердің жан-жақты қолдауы екіжақты ынтымақтастықты нығайту мен Қазақстан-Қытай арасындағы іскерлік байланысты кеңейтудегі маңызды қадам болды.
Сауда миссиясы аясында Сауда және интеграция министрі А. Шаққалиевтің қатысуымен форум өтті. Сондай-ақ ұлттық нақыштағы дәстүрлі киіз үйлер түрінде ұсынылған 3 экспозициядан тұратын көрмеде отандық өндірушілердің өнімдері көрсетілді.
2024 жылдың қорытындысы бойынша Қазақстан мен Шэньси провинциясы арасындағы тауар айналымы 382,3 млн АҚШ долларын құрап, өткен жылмен салыстырғанда 2,4 есеге өсті. Бұл көрсеткіштер қазақстандық өнімдерге деген Қытай нарығының қызығушылығының артып келе жатқанын және екіжақты сауда қатынастарының жоғары серпінін айқындады.
QazTrade сауда миссиясының қорытындысы бойынша Шэньси провинциясының Халықаралық сауданы дамыту комитетінің Сауда-өнеркәсіп палатасымен және AIJU Grain and Oil Industry Group компаниясымен ынтымақтастықты одан әрі нығайту жоспарлануда. Қол қойылған келісімдер екі елдің бизнес-қауымдастықтары арасында тікелей байланыс орнатып, қазақстандық экспорттаушыларға жаңа мүмкіндіктер ашады.